நீங்கள் தேடியது "தொழிலாளி மரணம்"

ஊத்தங்கரை:

கிருஷ்ணகிரி மாவட்டம் சாமல்பட்டியை அடுத்த கஞ்சனூர் நாடார் தெருவை சேர்ந்தவர் கணேசன் (வயது58) பனை மரம் ஏறும் தொழிலாளி. இன்று காலை 6 மணிக்கு பனை மரத்தில் ஏறினார்.

மரத்தின் உச்சியில் இருந்தபோது திடீரென்று மாரடைப்பு ஏற்பட்டது. மரத்திலேயே பிணமாக தொங்கி விட்டார்.

தீயணைப்பு படை வீரர்கள் விரைந்து வந்து மரத்தில் ஏறி பிணத்தை மீட்டு கொண்டு வந்தனர்.

முத்தூர்:

திண்டுக்கல் மாவட்டம் நிலாக்கோட்டை அடுத்த விளாம்பட்டியை சேர்ந்தவர் வீரகார்த்திக் (வயது31). இவரது மனைவி பெயர் கலா. வீரகார்த்திக் முத்தூர் அருகே உள்ள வீரசோழ புரத்தில் உள்ள ஒரு அட்டை கம்பெனியில் மிஷின் ஆப்பரேட்டராக பணிபுரிந்து வந்தார்.

சம்பவத்தன்று வீட்டில் வேலைக்கு போய் விட்டு வருவதாகவும் மறுநாள் காலை தாமதமாக வருவேன்..என்று மனைவியிடம் சொல்லி கொண்டு வீரகார்த்திக் வேலைக்கு சென்றார்.

ஆனால் மறுநாள் வெகு நேரம் ஆகியும் அவர் திரும்பி வரவில்லை. இந்த நிலையில் அப்பகுதியில் உள்ள கொடுமுடி ரோட்டில் டாஸ்மாக் மதுக்கடை அருகே வீரகார்த்திக் மயங்கி கிடந்ததை அவருடன் வேலை பார்க்கும் மோகன் பார்த்து அதிர்ச்சி அடைந்தார். உடனடியாக அவரை மீட்டு தனியார் ஆஸ்பத்திரிக்கு கொண்டு சென்றனர்.

ஆனால் அங்கு பரிசோதித்த டாக்டர் வீரகார்த்திக் ஏற்கனவே இறந்து விட்டார் என்று தெரிவித்தார்.

இந்த சம்பவம் குறித்து வெள்ளகோவில் போலீசார் வழக்குபதிவு செய்து வீரகார்த்திக் எப்படி இறந்தார்? என்பது குறித்து விசாரணை நடத்தி வருகிறார்கள்.

காடையாம்பட்டி:

சேலம் மாவட்டம் ஓமலூரை அடுத்துள்ள தாராபுரத்தில் பவர் பிளாக்கல் ஓட்டும் தொழில் நிறுவனம் செயல்பட்டு வருகிறது. இதில் கன்னங்குறிச்சி மன்னார் பாளையம் பகுதியை சேர்ந்த தங்கவேல் சூப்பர்வைசராக வேலை பார்த்து வந்தார்.

இந்நிலையில் அங்கிருந்து தங்கவேல் உட்பட 4 பேர் தீவட்டிப்பட்டியில் உள்ள தனியார் பள்ளிக்கு பவர் பிளாக் செங்கலை கொண்டு வந்தனர். அப்போது அவர் எதிரே உள்ள கடையில் டீ குடிப்பதற்காக சேலம்-தர்மபுரி நெடுஞ்சாலையில் ரோட்டை கடக்க முயனறார். அப்போது அந்த தனியார் பள்ளி வேன் தங்கவேல் மீது மோதியது. இதில் அவர் பலத்த காயம் அடைந்தார். அவரை மீட்டு சேலம் அரசு ஆஸ்பத்திரிக்கு அனுப்பி வைத்தனர். ஆனால் அவர் வரும் வழியிலேயே பரிதாபமாக இறந்தார். இது குறித்து தீவெட்டிப்பட்டி போலீசார் வழக்கு பதிவு செய்து விசாரித்து வருகின்றனர்.

கவுண்டம்பாளையம்:

கோவை பெரியநாயக்கன் பாளையம் ரங்கநாயகி நகரை சேர்ந்தவர் ரத்தினசாமி (வயது 68). தொழிலாளி. இவர் இன்று காலை வேலை முடிந்து மோட்டார் சைக்கிளில் வீட்டுக்கு புறப்பட்டார்.

ஜோதிபுரம் அருகே வந்தபோது எதிரே ஒரு கார் வந்தது. கண் இமைக்கும் நேரத்தில் மோட்டார் சைக்கிள் மீது கார் மோதியது.

இதில் தூக்கி வீசப்பட்ட ரத்தினசாமி தலை மற்றும் உடலில் பலத்த காயம் ஏற்பட்டு சம்பவ இடத்திலேயே பலியானார்.

இது குறித்து தகவல் கிடைத்ததும் பெரியநாயக்கன்பாளையம் போலீசார் சம்பவ இடத்திற்கு சென்று ரத்தினசாமியின் உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

கார் ஓட்டி வந்த திருமலைநாயக்கன் பாளையத்தை சேர்ந்த ஆசீர் வடிவேல் முருகன் (42) என்பவரை போலீசார் கைது செய்தனர்.

வந்தவாசி:

வந்தவாசி அடுத்த கொடநல்லூர் பகுதியை சேர்ந்தவர் சேகர் (வயது49) கட்டிட மேஸ்திரி. இவர் நேற்று மாலை சென்னவரம் என்ற பகுதியில் வேலைக்கு சென்று விட்டு மேல்மருவத்தூர் சாலையில் சைக்கிளில் வீடு திரும்பிக் கொண்டிருந்தார்.

அப்போது கோட்டை மூலை என்ற இடத்தில் அந்த வழியாக பால் ஏற்றி வந்த லாரி சைக்கிள் மீது மோதியது.

இதில் சேகர் லாரியின் சக்கரத்தில் சிக்கி சம்பவ இடத்திலேயே இறந்தார்.

இது குறித்து தகவல் அறிந்த வந்தவாசி தெற்கு போலீசார் சம்பவ இடத்திற்கு சென்று உடலை மீட்டு வந்தவாசி அரசு ஆஸ்பத்திரிக்கு அனுப்பி வைத்து விசாரணை நடத்தி வருகின்றனர்.

எடப்பாடி:

சேலம் மாவட்டம் மேட்டூர் உள்பட காவிரி பாய்ந்தோடும் பல்வேறு பகுதியில் இன்று ஆடிப்பெருக்கு விழா உற்சாகமாக கொண்டாடப்பட்டது.

பெண்கள் விரதம் இருந்து ஆற்றை வழிபட்டு, வாழை மட்டையில் விளக்கேற்றி நீரில் விட்டனர். புதுமணப் பெண்கள் தங்கள் தாலிக்கயிறு மாற்றி புதுத் தாலி கயிற்றை அணிந்தனர். அத்துடன் தங்களது திருமண பூமாலையை ஆற்றில் விட்டு காவிரி தாயை வணங்கினார்கள்.

எடப்பாடி அருகே உள்ள வெள்ளரி வெள்ளி வேட்டுவப்பட்டி பகுதியை சேர்ந்த கூலி தொழிலாளி சக்திவேல் (வயது 43) இன்று அதிகாலையில் காவிரி ஆற்றில் புனித நீராட தனது நண்பர்களுடன் கோணேரிப்பட்டி அருகே உள்ள கோட்டமேடு படித் துறைக்கு வந்தார்.

அப்போது சக்திவேல் காவிரி ஆற்றில் இறங்கி குளித்தபோது, எதிர்பாராத விதமாக ஆழமான பகுதிக்கு சென்று விட்டார். ஆற்று நீரின் இழுப்பு வேகம் அதிகமாக இருந்ததால் அவரால் உடனடியாக திரும்பி கரைக்கு வர முடியவில்லை. நீரில் தத்தளித்தார். சிறிது நேரத்திலேயே தண்ணீரில் மூழ்கி சக்திவேல் பரிதாபமாக இறந்தார்.

நண்பர்களின் கண் முன்பே இந்த சம்பவம் நேர்ந்தது. அவர்கள் அதிர்ச்சி அடைந்தனர். இது குறித்து எடப்பாடி தீயணைப்பு நிலையத்துக்கு தகவல் தெரிவிக்கப்பட்டது.தீயணைப்பு வீரர்கள் அங்கு விரைந்து வந்து ஆற்றில் இறங்கி சக்திவேல் உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். இந்த சம்பவம் குறித்து எடப்பாடி போலீசார் வழக்குப்பதிவு செய்து விசாரித்து வருகின்றனர்.

பலியான சக்திவேலுக்கு இன்னும் திருமணம் ஆகவில்லை. இவருக்கு ஒரு தம்பி உள்ளார். அவர் லாரி டிரைவராக பணிபுரிந்து வருகிறார். ஆடிப்பெருக்கை முன்னிட்டு புனித நீராட வந்தவர் ஆற்றில் மூழ்கி பரிதாபமாக இறந்த சம்பவம் அந்த பகுதியில் சோகத்தை ஏற்படுத்தி உள்ளது.